प्रशासनद्वारा सरकारी कार्यालयहरुमा छड्के अनुगमन

१ भदौ सुर्खेत । जिल्ला प्रशासन कार्यालय सुर्खेतले आइतबार वीरेन्द्रनगरस्थित संघीय तथा प्रदेश मातहतका सरकारी कार्यालयको अनुगमन गरेको छ ।

प्रशासनले १२ वटा संघीय सरकार मातहतका कार्यालयहरुको अनुगमनका क्रममा अधिकृत स्तरका ३, सहायकस्तरका १६ र पोशाक विनाका १६ जना कर्मचारी अनुपस्थित भेटिएको जनाएको छ ।

प्रशासन कार्यालयका अनुसासन संघीय खानेपानी तथा ढल निकास व्यवस्थापन आयोजनामा कार्यालयमा कुनै पनि कर्मचारी थिएनन् । त्यहाँका सबै कर्मचारी हाजिर लगाएर बाहिर गएको पाइएको प्रशासन कार्यालयले जनाएको छ ।

‘कार्यालय प्रमुख हाजिर लगाएर काठमाडौं गएको देखियो’ प्रमुख जिल्ला अधिकारी फणिन्द्रमणि पोखरेलले भन्नुभयो, ‘अन्य कर्मचारीहरु पनि हाजिर लगाएर कार्यालय छोडेर हिंडेको पाइयो ।’ यस्तै प्रदेशस्तरका कार्यालयको पनि प्रशासन कार्यालय अनुगमन गरेको छ ।

अनुगमनका क्रममा अधिकृतस्तरका १८, सहायकस्तरका ३० जना कर्मचारी कार्यालयमा अनुपस्थित भएको पाइयो । यस्तै २१ जना कर्मचारी पोशाक नलगाएर कार्यालयमा आएको पाइएको प्रशासन कार्यालयले जनाएको छ ।

कार्यालयका अनुसार प्रदेश सरकार मातहतका यातायात व्यवस्था कार्यालय र भू तथा जलाधार कार्यालयमा प्रमुखहरु अनुपस्थित थिए । ‘अनुगनका क्रममा फेला परेका तथ्यसहित कारवाहीका लागि माथिल्लो निकायमा सिफारिस गछौं’ प्रजिअ पोखरेलले भन्नुभयो, ‘सरकारी कार्यालयको अनुगमनलाई आगामी दिनमा पनि निरन्तरता दिन्छौं ।’

प्रकाशित मितिः आइतवार, भदौ १, २०७६     6:46:50 PM

Leave a Reply

Your email address will not be published. Required fields are marked *