प्रस्तावित नगरपालिका ४ र गाउँपालिका ५
२१ कात्तिक, काठमाडौं । स्थानीय तह र सिमाना निर्धारण गर्दा सुर्खेत जिल्लामा एक उपमहानगरपालिकासहित ९ वटा स्थानीय तह गठनको प्रस्ताव भएको छ । जसमध्ये ५ वटा गाउँपालिका र ४ वटा नगरपालिका पनि प्रस्ताव गरिएको छ ।
सुर्खेतले नयाँ मापदण्डअनुसार पुनः जिल्लाभर स्थानीय तह निर्धारण गरी आयोगलाई पठाएको छ । सुर्खेतमा अहिले ३ वटा नगरपालिका र ३९ वटा गाविस छन् । ती सबै मिलाएर सुर्खेतमा ९ स्थानीय तहको प्रस्ताव भएको हो ।
हालको वीरेन्द्रनगर नगरपालिकालाई उपमहानगरपालिका बनाउन प्रस्ताव गरिएको छ । सुर्खेतले प्रतिवेदनमा वीरेन्द्रनगरमा थप तीन गाविसहरु रतु, गढी र गर्पनलाई मिसाइने छ । भौतिक पूर्वाधार र आम्दानीको स्रोतका आधारमा हालको वीरेन्द्रनगर नगरपालिकालाई उपमहानगरपालिका समेत बनाउने सकिने भनी प्रतिवेदनमा खुलाइएको छ ।
यस्तै प्रतिवेदनमा गाउँपालिकामा प्रस्तावित लेकबेशी गाउँपालिकालाई पनि नगरपालिका बनाउन सकिने उल्लेख छ ।लेकबेशी गाउँपालिकामा साटाखानी, कल्याणपुर, दशरथपुर, नेटा र लेखफर्सा गाविसलाई मिलाउने प्रस्तावित प्रतिवेदनमा उल्लेख छ ।
यस्तै सुर्खेतले स्थानीय तहको संख्या प्रस्ताव गर्दा वडाको संख्या समेत निर्धारण गरेर पठाएको छ । बिरेन्द्रनगर नगरपालिकामा सबैभन्दा बढी १६ वटा वडा संख्या रहने प्रस्ताव छ ।
सुर्खेत जिल्लाका प्रस्तावित स्थानीय निकायहरु
चौकुने गाउँपलिकाः ५ वटा गाविस मिलाएर प्रस्ताव गरिएको यस गाउँपालिका ३८१.०३ क्षेत्रफलमा फैलिएको छ । लगाम, बेतान, विजौरा, गुटु, घाटगाउँ गाविसलाई मिलाएर प्रस्ताव गरिएको यस गाउँपालिकाको कुल जनसंख्या २५ हजार रहेको छ । यस गाउँपालिका अन्र्तगत १० वटा वडा कार्यालय रहनेछन् ।
पञ्चपुरी नगरपालिकाः साल्कोट, बावियाचौर, छाप्रे, विद्यापुर र तातापानी गाविसलाई मिलाएर पञ्चपुरी नगरपालिका प्रस्ताव गरिएको छ । यस नगरपालिकाको जनसंख्या ३२ हजार रहने छ भने ११ वटा वडा कार्यालय स्थापना गरिने प्रस्ताव गरिएको छ ।
वीरेन्द्रनगर नगरपालिकाः यसमा थप तीन गाविसहरु, रतु, गढी, गर्पन गाविस गाभ्ने प्रस्ताव छ । भौतिक पूर्वाधारले सम्पन्न भएको र जनसंख्या पनि एक लाखभन्दा माथि रहेकाले यसलाई उपमहानगरपालिकाको रुपमा विकास गर्न सकिने प्रस्ताव गरिएको छ ।
भेरीगंगा नगरपालिकाः यस नगरपालिकामा भेरीगंगा र लेखपराजुल गाविसलाई मिलाएर भेरीगंगा नगरपालिका बनाउन प्रस्ताव गरिएको छ । यहाँको जनसंख्या करिब ५१ हजार रहेको छ भने त्यहाँ १३ वटा वडा कार्यालय प्रस्ताव गरिएको छ ।
सुभाघाट नगरपालिकाः यस नगरपालिकामा गुर्भाकोट नगरपालिका तथा साहारे, मालारानी र धारापानी गाविसलाई मिसाइने छ । प्रस्तावित यस नगरपालिकामा करिब ४३ हजार जनसंख्या रहेको छ भने १४ वटा वडा कार्यालय प्रस्ताव छ ।
बराहताल गाउँपालिकाः पोखरीकाँडा, कुनाथरी, लेखगाउँ, हरिहरपुर, तरंगा गाविसलाई मिलाएर बराहताल गाउँपालिका प्रस्ताव गरेको छ । यस गाउँपालिकामा २६ हजार जनसंख्या रहेको छ । उनीहरुको सेवाका लागि १० वटा वडा कार्यालयहरु रहने प्रस्ताव गरिएको छ ।
चिङ्गाड गाउँपालिकाः चिङ्गाड गाउँपालिका सुर्खेत जिल्लाको सबैभन्दा सानो र गरिब गाउँपालिका बन्नेछ । रजेनारानीबास, मटेला, अवलचिङ, पाम्का गाउँविकास समितिलाई मिलाएर यस गाउँपालिका प्रस्ताव भएको हो । प्रस्तावित चिङ्गाड गाउँपालिकामा करिब १७ हजार जनसंख्या रहनेछ । ६ वटा वडा कार्यालयहरु प्रस्ताव गरिएको छ ।
लेकबेशी गाउँपालिकाः साटाखानी, कल्याण, दशरथपुर, नेटा र लेखफर्सा गाविसलाई मिलाएर लेकबेशी गाउँपालिका प्रस्ताव गरिएको छ । यस गाउँपालिकालाई अहिले नै नगरपालिकाको रुपमा विस्तार गर्न सकिने पनि प्रतिवेदनमा उल्लेख छ । प्रस्तावित लेकबेशी गाउँपालिकामा करिब ३० हजार जनसंख्या रहेको छ भने यहाँ १० वटा वडा कार्यालय प्रस्ताव गरिएको छ ।
सिम्ता गाउँपालिकाः सिम्ता गाउँपालिकामा सातवटा गाविसहरु रहने छन् । घोरेटा, काफलकोट, बजेडीचौर, काप्रीचौर, डाँडाखाली, खानीखोला, आग्रीगाउँलाई मिलाएर सिम्ता गाउँपालिका प्रस्ताव गरिएको हो । यस गाउँपालिकामा २५ हजार जनसंख्या छ ।
सुर्खेत जिल्ला पुर्नसंरचना स्थानीय तहको विवरण,२०७३
| क्र.स. | गा.पा./न.पा. | साविकका गा.वि.स./न.पा. | जनसंख्या | क्षेत्रफल (वर्ग कि.मि.) | प्रस्तावित वडा संख्या | कैफियत |
|---|---|---|---|---|---|---|
| १. | चौकुने गा.पा. | लगाम,बेतान,विजौरा,गुटु,घाटगाउँ | 25,240 | 381.03 | 10 | |
| २. | पञ्चपुरी न.पा. | साल्कोट, बावियाचौर, छाप्रे, विद्यापुर, तातापानी | 32,231 | 329.90 | 11 | |
| ३. | बराहताल गा.पा. | पोखरीकाँडा, कुनाथरी, लेखगाउँ, हरिहरपुर, तरङ्गा | 25,943 | 455.09 | 10 | |
| ४. | विरेन्द्रनगर न.पा. | वि.न.न.पा., रतु, गढी, गर्पन | 101,317 | 260.81 | 16 | उपमहानगरपालिका कालागि प्रस्ताव |
| ५. | चिङ्गाड गा.पा. | रजेनारानीबास, मटेला, अवलचिङ, पाम्का | 17,275 | 170.09 | 6 | |
| ६. | लेकबेशी गा.पा. | साटाखानी, कल्याण, दशरथपुर, नेटा, लेखफर्सा | 30,295 | 180.92 | 10 | नगरपालिकाका लागि प्रस्ताव |
| ७. | भेरीगङ्गा न.पा. | भेरीगङ्गा, लेखपराजुल | 41,407 | 150.19 | 13 | |
| ८. | गुर्भाकोट न.पा. | शुभाघाटन.पा., साहारे, मालारानी, धारापानी | 43,815 | 228.62 | 14 | |
| ९. | सिम्ता गा.पा | घोरेटा, काफलकोट, बजेडिचौर, काप्रीचौर, डाँडाखाली, खानीखोला, आग्रीगाँउ | 25,845 | 241.60 | 9 |
साभारः अनलाइन खबर
Prawash Kumar Shakya । २१ कार्तिक २०७३, आईतवार १५:०७ बजे