भारतको लुधियानामा पछिल्लो समयमा कसैको चर्चा छ भने, त्यो हो गधाको । गधा किन चर्चित भयो ? कारण निकै रोचक छ । एक व्यक्तिले गधालाई जुुन तरिकाले प्रयोग गरे त्यो सुन्दैमा हाँसो उठ्ने खालको छ ।
लुधियानाका एक व्यक्तिसँग स्कोडा कम्पनीको अक्टोबिया गाडी थियो । गाडी दिनदिनै बिग्रेर उनी हैरान बनेका थिए । पटक पटक सर्भिस सेन्टरमा लगेर गाडीका मिस्त्रीबाट मर्मत गराउँदा पनि समस्या समाधान भएन ।
बिग्रेर रुवाएको गाडीबाट दिक्क भएका उनले अन्ततः सबैलाई छक्कै पार्ने काम गरे । बिग्रेको गाडी तान्नका लागि अर्को गाडी प्रयोग गरेझैँ उनले दुुइवटा गधाको जिउमा आफ्नो हैरान पार्ने गाडीलाई डोरीले बाँधेर लतार्न लगाए ।
अझ रोचक त के भने दुुइवटै गधाको जिउमा उनले स्कोडा अक्टोभिया गाडी भन्ने कागजमा लेखेर टाँसिदिए । लाग्थ्यो वास्तविक स्कोडा अक्टोभिया त तिनै गधा पो हुन् ।
उनले भनेका छन्ः मैले यो गाडी सन् २०१५ को मार्च १९ मा किनेको थिएँ । तर गल्ती भएछ । यो गाडीसँगै दुुइवटा गधा पनि किन्नुपर्ने रहेछ ।
गाडीमा दिनहुँ कुनै न कुनै समस्या आइरहँदा समेत कम्पनीले कुनै भरपर्दो समाधान दिन नसकेको उनको गुनासो छ । उनले यस विषयमा कम्पनीका अधिकारीहरु तथा कम्पनीको फेसबुक पेजमा समेत गुनासो गरेका रहेछन् । तर कुनै समाधान निस्किएन । त्यसपछि उनले आफ्नो उक्त गाडीलाई गधाले तनाउन बाध्य भए ।
Prawash Kumar Shakya । २८ फाल्गुन २०७३, शनिबार ०९:४८ बजे