१२ पौष, रुकुम । रुकुम पश्चिममा जारी कर्णाली प्रदेश कप टी–२० क्रिकेट प्रतियोगितामा बिहिबार जाजरकोट र सल्यान विजयी भएका छन् । पहिलो जित हासिल गर्ने क्रममा जाजरकोटले जुम्ला र सल्यानले कालिकोटलाई पराजित गरेको हो ।
जिल्लाको चौरजहारीमा बिहिबार बिहान भएको प्रतियोगीताको दोस्रो खेलमा जाजरकोटले जुम्लालाई ४९ रनले पराजित गर्यो । टस हारेर ब्याटिङको निम्तो पाएको जाजरकोटले निर्धारित २० ओभरमा ७ विकेट गुमाएर १ सय १५ रनको योगफल खडा गरेको थियो ।
जाजरकोटका लागि प्रणव भडेलले अर्धसतकिय पारी खेले । उनि ५४ रन बनाएर नटआउट रहे । जाजरकोटका लागि सुमन गुरुङले १५ रन बनाउनुभएको हो । बलिङ तर्फ जुम्लाका श्री थापाले ४ ओभर बलिङ गर्दै १८ रन खर्चिएर ४ विकेट लिनुभएको थियो ।
१ सय १६ रनको विजयी लक्ष पछ्याएको जुम्ला १३ दशमलव ४ ओभरमा ६६ रन बनाउँदै अलआउट भयो । जुम्लाका कुनैपनि ब्याट्सम्यानले सम्झन लायक प्रदर्शन गर्न सकेनन् । जाजरकोटका लागि युनिस बिक्रम सिंहले ४, केशव अधिकारीले ३ र प्रणव भडेलले २ विकेट लिनुभएको थियो ।
अर्धसतक सहित २ विकेट लिनुभएका जाजरकोटका प्रणव भडेल म्यान अफ द म्याच घोषित हुनभयो ।
बिहिबार नै भएको दोस्रो खेलमा सल्यानले कालिकोटलाई ६१ रनले पराजित गरेको हो । टस जितेर ब्याटिङ रोजेको सल्यानले निर्धारित २० ओभरमा १ सय ७९ रन बनाएको थियो । उसका लागि चन्द्र बिसीले सर्वाधिक ७३ रन बनाउनुभयो ।
सुर्य बस्नेतले ३४ र निराजन पुनले १९ रनको योगदान दिनुभयो । कालिकोटका लागि मवित शर्माले २, प्रतिक गिरीले १ र सुमित माझिले १ विकेट लिनुभएको थियो ।
१ सय ८० रन बलियो विजयी लक्ष पछ्याएको कालिकोट १९ दशमलव २ ओभरमा १ सय १८ रन बनाएर अल आउट भयो ।
कालिकोटका सुनिल भण्डारीले ३६, सुमित माझिले १७ र प्रविण गिरीले १४ रन बनाउनु बाहेक अन्य ब्याट्सम्यानले सम्झन लायक प्रदर्शन गर्न सकेनन् । सल्यानका प्रविण अधिकारीले २ तथा दिवान पुन, सुरेश नेपाली, चन्द्र बिसी र सुरज बुढाथोकीले १/१ विकेट लिनुभयो ।
प्रतियोगीतामा भोली आयोजक रुकुम र सल्यान तथा सुर्खेत र जाजरकोट खेल्ने छन् ।
Milan Shrestha । १२ पुष २०७५, बिहीबार २०:३१ बजे