फाल्गुन २८, २०७२- नेपाली कांग्रेसको सभापतिमा शेरबहादुर देउवा निर्वाचित भएलगत्तै सरकार परिवर्तनबारे विभिन्न टिप्पणी भइरहेका बेला स्वयं देउवाले भने ओली सरकार आफ्नै बोझले ढल्ने बताएका छन् ।
कांग्रेसले अहिले सशक्त प्रतिपक्षीको भूमिका खेल्ने बताउँदै उनले यो सरकारमा पनि नजाने बताएका छन् । रिपोटर्स क्लबको साक्षात्कारमा बोल्दै उनले भने, ‘सशक्त प्रतिपक्ष नभए शासक तानाशाही हुन्छ । गलत विपक्षी भए प्रजातन्त्र कमजोर हुन्छ । दह्रो प्रतिपक्ष भए प्रजातन्त्र बलियो हुन्छ । त्यसैले हामी प्रतिपक्षमा बस्छौ । यो सरकारमा हामी जाँदैनौं ।’
आफ्नो उद्देश्य संघीय लोकतान्त्रिक गणतन्त्रलाई बलियो बनाएर अब प्रजातन्त्रालाई कसैले पनि खोस्न नसक्ने अवस्थामा पुर्याउने भएको भन्दै उनले संविधानको कार्यान्वयन, सीमांकन मिलाउने र मुलुकमा लगानीको वातावरण बनाएर समृद्ध र सम्पन्न नेपाल बनाउन लाग्ने बताए ।
उनले भने, ‘अहिले महंगी छ, कालाबजारी छ, आपूर्ति अस्तब्यस्त छ त्यसको विरुद्ध काग्रेसले संसद समेतमा आवाज उठाउँछ ।’ मधेसी मोर्चाले उठाएको सीमांकनसहितका मुद्दाहरुलाई वार्ताबाटै समाधान गर्ने स्पष्ट पार्दै आवश्यक परे संविधान संसोधनसमेत गर्न सकिने उनले बताए ।
सभापतिमा निर्वाचित भएपछि आफूमाथि पार्टीलाई मिलाएर अघि लैजाने जिम्मेवारी आएको पनि उनले बताए । देउवाले भने, ‘मेरो कार्यकालका कसैलाई काखापाखा गरिने छैन । सबैलाई समेटेर म अगाडि बढ्छु । रामचन्द्र पौडेलजी मेरो पुरानो सिनियार साथी हो । उहाँले धेरै दुख पाउनु भएको छ । उहाँसँग मिलेर काम गर्छु । उहाँलाई मिलाउने काम मेरो हो । उहाँसाग अनुभव छ । उहाँले लामो संघर्ष गर्नु भएको छ त्यसको मूल्याङकन हुन्छ ।’
सिफारिस फिर्ता गर्नु सभामुखको गल्ती
देउवाले न्यायपरिषदले गरेको सिफारिस फिर्ता गरेर सभामुख ओनसरी घर्ति मगरले गल्ती गरेको पनि बताए ।
‘सभामुखले हस्तक्षेप गर्ने होईन । सम्मानित पदले यस्तो काम गर्न हुँदैन । उहाँले फिर्ता पठाउने होईन, सुनवाई समिति बनाउने हो । फिर्ता गर्नु परे पनि सुनवाई समितिले गर्छ । न्यायाधीश सिफारिस मलाई चित्त बुझोस् नबुझोस् त्यसको अर्थ छैन । गलत काम सभामुखले गर्न सुहाउँदैन । सभामुख सम्मानित र तटस्थ पद हो,’ उनले भने ।
सभामुख घर्ती असल मान्छे भएपनि उनलाई कसैले फँसाएको हुनसक्ने भन्दै देउवाले यस विषयमा आफूले एमाओवादी अध्यक्ष पुष्पकमल दाहालसँग कुरा गर्ने पनि बताए ।
साभारः कान्तिपूर अनलाइन
Milan Shrestha । २८ फाल्गुन २०७२, शुक्रबार १४:०० बजे