ललित बसेल
सुर्खेत, २२ फागुन ।
सुर्खेत स्थित दृष्टिविहीन हेरविचार केन्द्रको सहयोगीदाता सामाजिक संजाल फेसबुक बनेको छ । दृष्टिविहीन बाल बालिकाहरुको अध्ययनमा सहयोग पुर्याउनकेन्द्रको स्थापना गरिएपनि आर्थिक सहयोग नपाएपछि संकटमा पर्दा सामाजिकसंजालको सहारा लिएर सहयोगी दाताहरु जुटाइएको हो । फेसबुकको मद्दतले अहिलेसम्म करिव ५ लाख रुपैया संकलन भइसकेको छ ।
२०६७ सालदेखि केन्द्र संचालनमा आएपनि आर्थिक सहयोग जुट्न नसक्दा संचालनमा कठिनाइ भएको केन्द्रका अध्यक्ष जीवनकुमार शाक्य बताउनु हुन्छ । सहयोग जुट्न नसकेपछि फेसबुकबाट सहयोगको आव्हान गरेको स्मरण गर्दै उहाँले अहिले सम्म करिव ५ लाख रुपैयाँ संकलन भइसकेको उल्लेख गर्नुभयो । उहाँले धेरैजसो सहयोग विदेशबाट आएको उल्लेख गर्नुभयो । ‘बढीमा ३ लाख रुपैयाँ सम्म सहयोग आएको छ,’ उहाँले भन्नुभयो ।
हेरविचार केन्द्रलार्इ कसैले जन्मदिनको, कसैला विहेको बार्षिकोत्सवको त कसैले जागीरमा बढुवा पाएको खुशीयालीमा रकम पठाउने गरेका छन् । पाए जतिसवै रकम उहाँले पारदर्शीरुपमा राखेको बताउनुभयो । कसले कति सहयोग गरेको छ, फेसबुकबाटै सार्वजनिक गर्नुभएको छ शाक्यले । आफूले मागी मागी हेरविचार केन्द्र चलाएको उनले बताउनुभयो । नास्ता खाने रकम समेत केन्द्रमै लगानी गरेको बताउँदै उहाँले फजुल खर्च कटाएर दृष्टिविहीन बालबालिकाहरुको शिक्षादीक्षामा सहयोग गर्न सवैसंग उहाँले आग्रह गर्नुभएको छ ।
आफूलार्इ दृष्टिविहीन हेरविचार केन्द्र संचालन गर्न प्रेरणा दिने दृष्टिविहीन मैतुराम नेपालीप्रति उहाँले आभार प्रकट गर्नुभयो । पढ्न नपाएर आत्मदाहगर्न लागेका नेपालीलार्इ बचाएर उनकै आग्रह बमोजिम ब्रेललिपिको पुस्तकको खोजी गर्दैगर्दा दृष्टिविहीन हेरविचार केन्द्र स्थापना हुन पुगेको स्मरण शाक्यले गर्नुभयो ।
अहिले केन्द्रमा १० जना दृष्टिविहीन आश्रित छन् । छात्र दृष्टिविहीनहरुलार्इ रामघाटमा राखिएको छ भने छात्रा दृष्टिविहीनहरुलार्इ उच्च मावि इत्राम मा राख्ने तयारी भइरहेको जानकारी उहाँले दिनुभयो । एक जना दृष्टिविहीन अहिले स्नात्तकोत्तर र अर्को एकजना स्नातक अध्ययनरत छन् । आफ्नो जीवनकालमा एउटा छात्राबास निर्माण गर्ने लक्ष्य रहेको अध्यक्ष शाक्यले बताउनुभयो ।‘२० जना अट्ने क्षमताको छात्राबास बनाउने लक्ष्य छ,’ उहाँले भन्नुभयो, ‘त्यसकालागि सुर्खेत बहुउद्देश्यीय सहकारी संस्थामा डेढ लाख रुपैया राखिएको छ । ’बाँकी सवै दाताहरुको आशमा रहेको उहाँले सुनाउनुभयो ।
शाक्यले संचालन गर्नुभएको दृष्टिविहीन हेरविचार केन्द्रलार्इ सवैले सानो भएपनि सहयोग गर्नुपर्ने सुझाव पत्रकार महासंघ सुर्खेतका अध्यक्ष गणेशकञ्चन भारतीले दिनुभयो । उहाँले सामाजिक संजालको भरमा पनि सहयोग जुटाएर दृष्टिविहीन हेरविचार केन्द्र संचालन गर्नु आफैमा चुनौती भएको भन्दै सरकारी तथा गैर सरकारी निकायहरुले यतातर्फ आँखा लगाउनुपर्ने उल्लेख गर्नुभयो ।
राष्ट्रिय अपांग महासंघ सुर्खेतका अध्यक्ष सम्मरबहादुर मल्लले समन्वय गरेर अगाडि बढ्न सुझाव दिनुभयो ।
यसैविच केन्द्रको हिजो साधारण सभा सम्पन्न भएको छ । सभाले शाक्य कै अध्यक्षतामा ५ सदस्यीय कार्य समिती गठन गरेको छ । जस्मा उपाध्यक्ष मेनका आचार्य ,सदस्यहरूमा मैतुराम नेपाली, दुर्गा आचार्य रेणुका काईराला रहनुभएको छ । बाकि अर्काे कार्यसमितीकाे बैठकमा मनाेनयन हुने अध्यक्ष शाक्यले बताउनुभयो । सभा नेपाल पत्रकार महासंघ सुर्खेतका अध्यक्ष गणेशकन्चन भारतीको आतिथ्यतामा सम्पन्न भएको हो
Milan Shrestha । २३ फाल्गुन २०७२, आईतवार ११:१३ बजे