- ‘केसी सुतेकाे बेड र स्लाइन स्ट्यान्ड कवाडीमा फ्याँकिएका सामाग्री’
गणेशमान सिंह नाक, कान, घाँटी भवनको सानो कोठामा अनशनरत डा.केसीलाई मंगलबार पिसाब कम आउनुका साथै सास फेर्न गाह्रो भएपछि हेरचाह गरिरहेका विद्यार्थीले चिकित्सकीय सहयोग माग्दा दिइएन । उनको शरीरमा पानीको मात्रा कम देखिएको छ ।
‘हामीले स्लाइन पानी दिन नसा खोल्न ‘इएनटी’का नर्सिङ स्टाफलाई सघाउन अनुरोध गर्दा उहाँहरूले अस्पतालका निर्देशकले त्यहाँ नजान र सहयोग नगर्न भन्नु भएको छ भनेर मान्नुभएन,’ डा.केसीलाई सघाइरहेका एमबीबीएस अन्तिम वर्षका विद्यार्थी सुमन आचार्यले भने, ‘स्लाइन पानी राख्ने स्ट्यान्डसमेत अस्पतालले दिएन । हामीले कवाडीमा फ्याँकिएको एउटा बिग्रेको स्ट्यान्ड प्रयोग गर्यौं ।’ उनका अनुसार अस्पतालका कर्मचारीले नसघाएपछि रेजिडेन्ट चिकित्सकहरूले नै उनलाई स्लाइन दिएका थिए ।
नेपाल मेडिकल स्टुडेन्ट सोसाइटी, नेसनल रेजिडेन्ट डाक्टर एसोसिएसन र विद्यार्थी कल्याणकारी कमिटिले मगंलबार अस्पताल निर्देशकलाई संयुक्त रूपमा लिखित पत्र दिँदै डा.केसीलाई स्वास्थ्य लगायत विषयमा सघाउन आग्रह गरेका छन् । विगतमा ७ पल्टको अनशनमा अस्पताल सञ्चालन र सेवामा कुनै असर नपरेको जनाउँदै उनीहरूले डा.केसीप्रति अस्पताल प्रशासनबाट भएको असहयोग र गैरजिम्मेवारपनको निन्दा गरेका छन् ।
डा.केसीको बिग्रँदो स्वास्थ्य स्थितिलाई ध्यानमा राखेर उपयुक्त कोठासँगै नजिकबाट निगरानी गर्न उपकरण र जनशक्ति तुरुन्त उपलब्ध गराउनसमेत विद्यार्थीले माग गरेका छन् । रेजिडेन्ट डाक्टर र विद्यार्थीले अस्पतालमा कार्यरत सबै प्राध्यापक, फ्याकल्टी, कर्मचारी लगायतलाई व्यक्तिगत स्वार्थ तथा धम्की र दबाबमा नपरी निष्ठाको लडाइँमा साथ दिन आहवान गरेका छन् ।
रेजिडेन्ट डाक्टर एसोसिएसनका अध्यक्ष डा.लिजन महर्जनले डा.केसीलाई उपयुक्त चिकित्सा सुविधा दिन अस्पताल निर्देशकलाई मंगलबार बुझाएको पत्रको जवाफपछि थप रणनीति तय गरिने बताए ।
चिकित्सक संघले भेट्यो
नेपाल चिकित्सक संघका महासचिव डा.मुक्तिराम श्रेष्ठले मंगलबार अनशनस्थल पुगी डा.केसीसँग भेटेका छन् । भेटमा केसीले पहिलेजस्तो सम्झौता नहुने जनाउँदै सबै माग पूरा नभएसम्म अनशन जारी रहने बताएका थिए । अनशनबारे छलफल गर्न बुधबार संघको बैठक बस्ने तयारी भएको श्रेष्ठले बताए ।
राष्ट्रिय चिकित्सक संघ नेपालले पनि डा. केसीका मागप्रति सहमति जनाउँदै उनको आन्दोलनमा ऐक्यबद्घता जनाएको छ । संघका अध्यक्ष डा.सन्तोष पौडेलले विज्ञप्ति जारी गर्दै सरकारलाई पहिले भइसकेका सम्झौता अविलम्ब लागू गर्नुका साथै डा.केसीका माग पूरा गर्न माग गरेको छ ।
डिन कार्यालयको विरोध
शिक्षण अस्पतालमा एमबीबीएस अध्ययन गरिरहेका विद्यार्थीहरूको संस्था नेपाल मेडिकल स्टुडेन्ट सोसाइटी -एनएमएसएस)ले चिकित्सा शास्त्र अध्ययन संस्थान, डिनको कार्यालयले डा.केसीको अनशनमा प्रत्यक्ष वा अप्रत्यक्ष संलग्नता भए कारबाही गरिने भनी जारी गरेको विज्ञप्तिको भत्र्सना गरेको छ ।
एनएमएसएसले ‘धम्कीको शैलीमा विद्यार्थीहरूको आत्मसम्मानमा आँच पुग्ने गरी’ डिनको कार्यालयले विज्ञप्ति निकालेको भन्दै डा.केसीको पक्षमा जुनसुकै पाइला चाल्न तयार रहेको जनाएको छ । डा. केसीलाई छिट्टै उपयुक्त स्थान उपलब्ध गराउनसमेत एनएमएसएसले माग गरेको छ ।
साभारः कान्तिपूर अनलाइन
Prawash Kumar Shakya । २९ असार २०७३, बुधबार ०२:३३ बजे