‘करियरभन्दा संघर्ष जटिल
एक समय ‘साह्रै मीठो रैछ कुवाको पानी’, ‘परेलीमै छौ कि कसो’, ‘च्याङ्बा ओइ च्याङ्बा’, ‘देशै रमाइलो’, ‘चोरेर लग्यो’, ‘कपालै कोरी, चिटिक्कै परी’जस्ता गीत बजार गुञ्जायमान थिए । गीतका भाका लाखौं श्रोताको मुखमा झुन्डिएका थिए ।
आज पनि यी गीत सुनेर आनन्द लिने श्रोताको संख्या कम छैन । यद्यपि यी शब्दमा सुरिलो आवाज सजाउने गायिकाको नाम सबै श्रोतालाई कण्ठस्थ नहुन सक्छ ।
सन् १९७९ मा भारतको कलकत्तामा जन्मिएकी मौसमी गुरुङको मेलोडियस संगीतको छुट्टै स्वादजस्तै जीवन कथा पनि फरक छ ।
जटिल अप्रेसनको सफलतापछि उनी यतिबेला सांगीतिक क्षेत्रमा पुनः चर्चामा छिन् । क्याप्टेन नैनासिंह गुरुङ र चिनीमाया गुरुङको कोखबाट जन्मिएकी उनको शिक्षादीक्षा भारतकै विभिन्न सहरमा भयो । लखनउबाट एसएलसीसम्मको शिक्षा लिएकी उनले प्लस टुसम्मको शिक्षा शैक्षिक सहर देहरादुनमा लिइन्।
भारतीय सेनामा कार्यरत पिता नैनसिंहको जागिरको सिलसिलामा उनले त्यहाँका सहर, संस्कृति र जीवन छाम्ने मौका पाएकी हुन् ।
सन् २००१ मा नेपाल फिरेपछि उनले आफूभित्रको रुचिलाई माझेर कला क्षेत्रमा टल्काउने जमर्को गरिन् । गन्धर्व संगीत केन्द्रमा संगीत सिक्न थालिन् ।
संगीतकार डीबी गुरुङको एल्बममा ‘देशै रमाइलो’ बोलको गीत गाएर देशप्रेम दर्शाइन् । ‘धेरैले गीत रुचाए’, गायिका मौसमीले स्मरण गरिन्, ‘त्यसले मभित्र अब झन् राम्रो गर्नुपर्छ भन्ने बोध गरायो ।’
चार वर्षको संंगीत प्रशिक्षणपछि उनले रेडियो नेपालमा स्वर परीक्षा पास गरिन् । जीवन चलाउने केही समय उनले शिक्षिकाको रूपमा समेत काम गरिन् ।
देशै रमाइलो पछि उनको गायन क्षेत्रमा रमाइला क्षणहरू थपिँदै गए । २०६० सालमा मौसमीको एकल एल्बम ‘अनफरगेटेबल’ बजारमा आयो ।
एल्बमका परेलीमै छौ कि कसो र मेरो मन बोलको गीतले उनलाई चर्चामा ल्यायो । त्यसपछि च्याङ्बा ओई च्याङ्बा, कान्छी हो कान्छी, लाहुरेकी छोरी हुँ म, साह्रै मीठो रैछ कुवाको पानीजस्ता गीत श्रोता दर्शकमाझ आएपछि त उनी नेपाली सांगीतिक क्षेत्रमा सफल गायिकाको पर्याय बनिन् ।
कर्मभन्दा पर केही नसोच्ने उनी कहिल्यै सम्मान पुरस्कारको पछि लागिनन् । तै पनि उनले हिट्स एफएम अवार्ड, इमेज एफएम अवार्ड र दुई पटक कान्तिपुर अवार्ड हात पारिन् । ‘अनफरगेटेबल’पछि ‘पल’, ‘महसुस’जस्ता एल्बम श्रोतामाझ ल्याएकी उनले विभिन्न मुलुकमा आफ्नो गीत प्रस्तुत गरिसकेकी छन् ।
ट्युमरको तनाव
सांगीतिक कार्यक्रमको शिलशिलामा उनी पाँच महिनाका लागि बेलायत गएकी थिइन् । त्यहीबेला उनमा आलस्यता बढ्यो । निद्रामात्रै लाग्न थाल्यो । हुँदाहुँदा आवाजमा असर पर्यो । हाइनोटमा गाउनै नसक्ने भइन् । ‘गाउँदागाउँदै बेसुरा हुन थालेँ’, गायिका मौसमीले दुःखको त्यो क्षण सम्झिन्, ‘लङदेखि सर्ट ट्वाइलेटसमेत अनकन्ट्रोल हुन थाल्यो, म त फ्रस्टेड नै भएँ ।’
भाइको सल्लाहमा उनी नेपाल फर्किइन् । मेडिकेयर, टिचिङ हुँदै न्युरो अस्पतालसम्म उपचारका लागि यात्रा गरिन् । ‘कसैले पत्ता लगाएन्’, मौसमीले भनिन्, ‘निकै गाह्रो भएपछि न्युरोले एमआरआई गर्यो, अनि पत्ता लाग्यो, टाउकोमा मासु पलाएको रहेछ ।’ त्यसबेला मौसमीलाई ठूलो पीडाबोध भयो ।
.png?resize=640%2C449)
गायिका मौसमीको उपचार डा. उपेन्द्र देवकोटाले गर्ने भए । ‘उपचारका क्रममा डा. देवकोटाले ब्रिफ गर्दा निकै डर लाग्यो’, उनले भनिन्, ‘डाक्टरले बायाँ अंगमा असर पर्न सक्छ, कान नसुन्ने, आँखा नदेख्ने वा मुख बांगिने आधाआधा सम्भावना रहन्छ भन्नुभयो । रोग लागेकोभन्दा रोगले छोड्ने साइड इफेक्टको चिन्ताले मलाई थप घाइते बनायो ।’
संगीतको सुरले देशविदेशका श्रोताको मन जितिसकेकी मौसमी यतिबेला आफैंसँगको संघर्षमा एक्लो थिइन् । यद्यपि उनको स्वास्थ्यलाभकोकामना गर्ने परिवार, शुभेच्छुक र भौतिक रूपमै निको पार्न सक्रिय डाक्टरको टिम थियो ।
११ मार्च २०१४ मा सफल अप्रेसनपछि उनलाई आईसीयूबाट क्याबिनमा सारियो । क्याबिन कोठामा टीभी खुला थियो । टीभीमा ‘सावन आया बादल छाया’ बोलको हिन्दी गीत बजिरहेको रहेछ । त्यही गीतसँगै गाउन सुरु गरिन् ।
श्रीमान् रेशम गुरुङसहित परिवारका मानिस अलमलमा परे । ‘दुरुस्तै गीत गाउन सकेपछि म त खुसीले उफ्रिएँ’, गायिका मौसमीले भनिन्, ‘मेरो बायाँ कान स्पष्ट थियो, आँखा पनि दुरुस्त थियो ।
त्यो खुसीको बयान गर्न मसँग शब्द नै छैन ।’ त्यसपछि उनले फेरि आफ्नै गीत ‘साहै्रै मिठो रैछ कुवाको पानी’ गाएर आफैंलाई जाँचिन् । त्यसपछि जिन्दगी झनै मीठो लाग्यो । त्योभन्दा मीठो प्रकृतिको उपहार जिन्दगी धन्य लाग्यो ।
निष्क्रिय बस्नै नसक्ने मौसमी यतिबेला फेरि चर्चामा छिन् । केही वर्षको अन्तरालपछि श्रोता दर्शकमाझ आएको ‘अलि अलि गर्दा गर्दै’ बोलको गीतले अहिले चर्चामा ल्याएको छ ।
करियरको संघर्षभन्दा जटिल जीवन संघर्षमा जित हात पारेकी मौसमी अहिले फेरि दिमागमा पलाएको अर्को मासुका कारण हरेक ६ महिनामा अस्पताल पुग्न बाध्य छिन् । ‘आत्मविश्वास पनि केही रहेछ, त्योभन्दा ठूलो औषधि श्रोता शुभेच्छुकको माया हो झैं लाग्छ ।’
साभारः अन्नपूर्ण पोष्ट
Prawash Kumar Shakya । १८ असार २०७३, शनिबार ०७:३२ बजे