सिमकोट: हुम्लालाई राष्ट्रिय सडक सञ्जालमा जोड्ने कर्णाली कोरिडोरको आइतबार उद्घाटन गरिएको छ । हुम्लालाई २ वर्षमा सडक सञ्जालमा जोड्ने योजना सार्वजनिक भएको एक सातामै कोरिडोर उद्घाटन भएको हो ।कर्णाली कोरिडोरको निर्माणमा भएको ढिलाइबारे स्थलगत अनुगमनका लागि गएको संसद्को विकास समितिका सभापति रवीन्द्र अधिकारीले कोरिडोरको प्रारम्भिक बिन्दु जितेगडामा आइतबार सडक उद्घाटन गरेका हुन् ।
कालीकोटको जितेगडादेखि हुम्ला सदरमुकाम सिमकोटसम्मको १ सय ९६ किलोमिटरको कोरिडोर दुई वर्षभित्र सम्पन्न गर्न विकास समितिले निर्देशन दिएको छ ।
अधिकारीले भने, ‘हरेक वर्ष सरकारले हुम्लालाई सडक सञ्जालमा जोड्ने प्रतिबद्धता व्यक्त गर्छ तर सडक पुगेको छैन । अबको २ वर्षमा सेनाले कुनै पनि हालतमा यो सडक निर्माण सम्पन्न गर्नुपर्छ ।’
आइतबार बिहान सेनाको हेलिकोप्टरबाट सुर्खेत हुँदै कर्णाली कोरिडोर स्थलगत भ्रमणमा आएको ९ सदस्यीय विकास समितिले कर्णालीको विकासका लागि सरकारले प्राथमिकताका साथ उठाउनुपर्ने निष्कर्ष निकालेको छ ।
टोलीमा संलग्न सांसद जीवनबहादुर शाहीले कर्णालीको विकासका लागि कर्णाली कोरिडोर विकासको पहिलो प्राथमिकता भएको बताए ।
विकासका लागि ९ वटा माग
कर्णाली कोरिडोरको अवस्था बुझ्न गएको विकास समितिसमक्ष हुम्लाका राजनीतिक दलले जिल्लाको विकासका लागि ९ बँदे माग राखेका छन् । राजनीतिक दलका तर्फबाट एमाले उपाध्यक्ष ज्ञामी बुमीले मागपत्र पेस गर्दै हुम्लालाई अबका २ वर्षमा सडक सञ्जालमा जोड्नुपर्ने, हुम्लाको हिल्सा सिमकोट मोटरबाटोको निर्माणकार्य मौसमका कारण हरेक वर्ष ठूलो रकम फ्रिज जाने भएका कारण हिल्सा सिमकोट कबाडीसम्म बिस्तार गर्नुपर्ने, २ मेगावाटको विद्युत् उत्पादन गर्न पहल गर्नुपर्ने माग गरे ।
साभारः अन्नपूर्ण पोष्ट
Prawash Kumar Shakya । २४ जेष्ठ २०७३, सोमबार ०३:०८ बजे