१२ चैत, काठमाडौं । सिटी सेन्टरमा फिल्म हेर्न पुगेका कृषि मन्त्री हरिबोल गजुरेल बाहिर निस्केर बच्चाजसरी रोएका छन् । डब्बु क्षेत्रीद्वारा निर्देशित फिल्म राहदानी हेरेर निस्केपछि उनले क्यामराकै अगाडि डाँको छोडेका हुन् ।
वैदेशिक रोजगारीको विषयमा बनेको फिल्म हेर्न मन्त्री आफ्नो दलबलसहित बिहीबार बेलुकी सिटी सेन्टर पुगेका थिए । फिल्ममा भावुक सिन आउँदा हलभित्रै मन्त्रीले आँशु झार्न थालेको निर्देशक क्षेत्रीले बताए ।
‘फिल्मको कथामा एक गरिब परिबारको गाई मरेको दृष्यपछि मन्त्रीज्यू भावविव्हल हुनुभएको थियो,’ क्षेत्रीले अनलाइखबरसँग भने, ‘त्यसपछि लगातार उहाँको आँखामा आँशु छचल्किइरहेको मैले देखेँ ।’
फिल्म सकिएर बाहिर निस्कदा मन्त्री गजुरेल निकै भावुक मुद्रामा थिए । उनलाई सञ्चारकर्मीले रोकेर फिल्मको विषयमा प्रतिक्रिया मागे । तर मन्त्रीले धेरै बोल्न सकेनन् ।
‘यो चलचित्र सत्यमा आधारित छ । मैले कतार दुवईमा जाँदा जे देखेँ त्यसलाई यहाँ कलाकारले पर्दामा प्रस्तुत गर्नुभएको छ । यो सटिक यथार्थपरक छ । मलाई लाग्छ, यो विदेशीएका युवाहरुको…’ यति भन्नासाथ मन्त्रीले मुख बिगारे अनि क्वाँक्वाँ गरे । त्यसपछि आफ्नै हातले अनुहार छोपेर झण्डै घुुँक्क घुँक्क गर्दै झण्डै आधा मिनेट रोए । अनुहारबाट हात हटाएर पनि रोइरहेपछि निर्देशक क्षेत्रीले उनलाई त्यहाँबाट निकालेका थिए ।
साभारः अनलाइन खबर
Milan Shrestha । १२ चैत्र २०७२, शुक्रबार ०७:४४ बजे