१३ चैत्र, सुर्खेत । कर्णाली प्रदेशमा कोरोना भाईरस (कोभिड–१९)को रोकथाम तथा प्रतिकार्यको कामलाई थप तिव्रता दिईने भएको छ ।
आज विहिवार विहान मुख्यमन्त्री महेन्द्रवहादुर शाहीको अध्यक्षतामा विषयगत मन्त्री र सचिवहरुको संयुक्त वैठक वसि हालसम्म भएका कामको समिक्षा गर्नुको साथै आगामि दिनमा प्रतिकार्यको कामलाई तिव्र र प्रभावकारी बनाउने निर्णय गरेको हो ।
वैठकमा मुख्यमन्त्री शाहीले विश्वव्यापी रुपमा देखिएको कोरोना संकटको सामाधान सरकारको तत्कालिन प्राथमिकतामा रहेको बताउदै रोकथाम तथा प्रतिकार्यको कामलाई उच्च प्राथमिकताका साथ अगाडि बढाउन निर्देशन दिनुभयो । उहाँले विपद व्यवस्थापन कार्यकारी समिति, अनुगमण समिति, आपुर्ति समिति तथा जिल्ला र स्थानीय तहका समितिहरुलाई थप सक्रिय बनाउन र कोरोना रोकथाम तथा प्रतिकार्यलाई थप प्रभावकारी बनाउन पनि निर्देशन गर्नुभयो ।
वैठकले स्वास्थ्यकर्मीहरुका लागि आवश्यक उपकरण, औजार, सुरक्षा सामाग्रि र औषधि लगायतका सामाग्रि तत्काल आपुर्तीका लागि संघीय सरकार, नीजि आपुर्तीकर्ताहरु, वाह्य आपुर्तिकर्ताहरुलाई अनुरोध गर्नुको साथै सम्भावित सवै उपायहरु अवलम्वन गर्ने निर्णय गरेको छ । यस्तै कर्णाली स्वास्थ्य विज्ञान प्रतिष्ठान जुम्लावाट जुम्ला, कालिकोट, मुगु, र हुम्ला जिल्ला, चौरजहारी सामुदायिक अस्पत्तालवाट रुकुम पश्चिम, जाजरकोट, डोल्पा र पुर्वी सुर्खेत जिल्लाको कार्यक्षेत्र तोकी जनशक्ति परिचालन गरि गर्न निर्देशन गर्ने निर्णय गरेको छ ।
वैठकले प्रतिकार्य योजनाको लागि आवश्यक आर्थिक व्यवस्थापन तथा परिचालनका लागि आर्थिक मामिला तथा योजना मन्त्री प्रकाश ज्वालालाई जिम्मेवारी दिने, प्रदेश राजधानी र जिल्ला र स्थानीय तहमा रहेका क्वारेन्टाईनको समन्वय सहजीकरण गर्न भुमि व्यवस्था तथा कृषि सहकारी मन्त्री विमला केसीलाई जिम्मेवारी प्रदान गर्ने, प्रदेश अस्पताल र जिल्ला अस्पतालहरुमा संकास्पद विरामीहरुलाई आईसोलेशनमा राख्ने, उपचार गर्ने र जनशक्ति परिचालन गर्ने कार्यको समन्वयको लागि सामाजिक विकास मन्त्री दल रावललाई जिम्मेवारी दिने निर्णय गरेको छ ।
यसैगरि दश वटै जिल्लामा आपुर्ति व्यवस्थालाई प्रभावकारी वनाउन उद्योग, पर्यटन, वन तथा वातावरण मन्त्री नन्दसिं वुढाको नेतृत्वमा रहेको समितिलाई थप सक्रिय वनाउने पनि वैठकले निर्णय गरेको छ ।
प्रतिकार्य तथा पुर्वतयारीका कार्यहरुमा खटने समिति तथा युनिटहरुको नियमित वैठक, प्रतिवेदन कार्यका लागि मुख्यमन्त्री तथा मन्त्रिपरिषद कार्यालयका सचिवको नेतृत्वमा हेल्प डेस्क संचालनमा ल्याउने र प्रतिवेदन, समन्वय तथा संचारको कामलाई विधुतीय तथा सामाजिक संजालको माध्यमवाट गर्ने निर्णय पनि वैठकले गरेको सुचना अधिकारी केशव उपाध्यायले जानकारी दिनुभयो ।
यसैवीच मुख्यमन्त्री शाही लगाएतको टोलीद्वारा प्रदेश राजधानी वीरेन्द्रनगर स्थित खुलामञ्चमा निर्माण भैरहेको क्वारेन्टाईन निर्माण कार्यको अवोलकन तथा निरिक्षण गरेको छ ।
प्रदेश सरकार र नेपाली सेनाद्वारा निर्माणाधिन ४०० वेडको क्वारेन्टाईन निर्माण कार्य अन्तिम चरणमा रहेको, शौचालय निर्माण, खानेपानी तथा विद्युत जडान कार्य भईरहेको छ । क्वारेन्टाइनमा भोली देखि नै १०० जनालाई राख्ने गरि तयारी भएको नेपाली सेनाका पृतनापति सरोज प्रताप राणाले जानकारी दिनुभयो ।
Prawash Kumar Shakya । १३ चैत्र २०७६, बिहीबार १६:११ बजे