पवन जायसवाल
नेपालगन्ज (बाँके) क्रियाशील पत्रकार महिला बाँकेको १८औं वार्षिकोत्सव विविध कार्यक्रम गरी भव्यताका साथ नेपालगन्जमा मनाएको छ । डब्लुडब्लुुजे बाँकेले वार्षिकोत्सवको अवसरमा शनिवार नेपालगन्जमा स्मारिका विमोचन, क्रियाशील पत्रकार महिलाको बाँके भेला र सम्मान कार्यक्रम गरेको हो ।
वार्षिकोत्सव समारोहको संस्थाका केन्द्रीय अध्यक्ष तथा कार्यक्रमका प्रमुख अतिथि रामकला खड्काले उद्घाटन गर्नुभएको थियो । अध्यक्ष खड्काले पत्रकार महिलाको संख्यात्मक र गुणात्मक विकासका लागि क्रियाशील पत्रकार महिला संगठित भएको बताउँदै संस्थाले महिला पत्रकारका क्षेत्रमा काम गरिरहेको जानकारी दिनुभयो । डब्लुडब्लुजे बाँकेका अध्यक्ष सावित्री गिरीको अध्यक्षतामा सम्पन्न कार्यक्रममा संस्थाका लुम्बिनी प्रदेश अध्यक्ष लीला शाहले पत्रकार महिलाहरुको भबिष्य पत्रकारिता क्षेत्रमा राम्रो रहको बताउदै निरन्तरताका लागि सबैको समन्वयात्मक भुमिका आवश्यक रहेको बताउनुभयो ।
त्यस्तै सञ्चारिका समूहको लुम्बिनी प्रदेश उपाध्यक्ष रुपा गहतरा, बाँके शाखा संस्थापक अध्यक्ष अक्षरी पोखरेल, नेपाल पत्रकार महासंंघ बाँके शाखा अध्यक्ष नवीन गिरी, उपाध्यक्ष करुणा शाह, नेपालगन्ज उपमहानगरपालिकाका महिला तथा बालबालिका शाखा प्रमुख पवित्रा पुरी, नेपाल पत्रकार महासंघका पूर्वकेन्द्रीय सदस्य झलक गैरे, महासंघका पूर्वसभापति नीरज गौतम, बरिष्ठ पत्रकार शंकरप्रसाद खनाल, समाजवादी प्रेस संगठन बाँकेका अध्यक्ष लोकनाथ शर्मा, सञ्चारिका समूह बाँकेका अध्यक्ष पवित्रा परियार, प्रेस यूनियन बाँकेका उपाध्यक्ष कमल खत्री, नेपालगन्ज उद्योग वाणिज्य संघका पूर्वअध्यक्ष कृष्णप्रसाद श्रेष्ठ, महिला उद्यमी तारा रोकाय र एक्टिङ स्टार विजेता नवीना रानाभाट लगायतले संस्थाको उत्तरोत्तर प्रगतिको कामना गर्नुभएको थियो ।
कार्यक्रमको उदेश्य माथि प्रकाश पार्दे क्रियाशिल पत्रकार महिला बाँकेका अध्यक्ष साबित्री गिरी पत्रकार महिलाहरु ब्यवसायिक हुन जरुरुी रहेको बताउदै आगामी दिनमा सबै पत्रकार महिलाहरु एकजुट भएर अगाडि बढ्नुपर्ने धारणा राख्नुभयो । उहाँले हाम्रो आवाज स्मारिक बिमोचनमा आएका कठिनाइले थप मार्गदर्शन गरेको औल्याउनुभयो । कार्यक्रममा सहभागिहरुले पत्रकार महिलाहरुको पेशागत सुरक्षा र निरन्तरताका लागि लेखन क्षमतामा बृद्धि हुनुपर्ने बताउदै हाम्रो आवाज स्मारिकाले यो प्रयासको थालनी गरेकोमा खुशी ब्यक्त गरेका थिए ।
सो अवसरमा अभिनयमा आधारित रियालिटी शो एक्टिङ स्टारको उपाधि विजेता नवीना रानाभाट सहित ३ जनालाई संस्थाले सम्मान गरेको छ । संस्थाकी केन्द्रीय अध्यक्ष रामकला खड्का, लुम्बिनी प्रदेश अध्यक्ष लीला शाह र जिल्ला अध्यक्ष सावित्री गिरीले संयुक्त रुपमा रानाभाटलाई सम्मानपत्र र दोसल्ला ओढाएर सम्मान गर्नुभएको हो । संस्थाले सो अवसरमा नेपालगन्जकी पत्रकार सन्ध्या गैरेलाई उदाउँदो पत्रकारका रुपमा सम्मान गरेको थियो ।
दैनिक नेपालगन्ज पत्रिकामा कार्यरत सन्ध्या गैरेलाई नगद २ हजार १ सय रुपैयाँ, सम्मान–पत्र र दोेसल्ला ओेढाएर सम्मान गरिएको थियो । त्यसैगरी जिल्लामा क्रियाशील पत्रकार महिला (डब्लुडब्लुजे)को शाखा स्थापना गर्ने वरिष्ठ पत्रकार अक्षरी पोखरेललाई पनि सम्मान गरिएको थियो । सो अवसरमा संस्थाले महिलाका विषय केन्द्रीत हाम्रो आवाज नामक स्मारिकाको तेस्रो अंक पनि विमोचन गरिएको थियो । यसै गरी १० बुँदे घोषणा पत्र जारी गरिएको थियो ।
१. पेशागत पत्रकार महिलाको पेशागत हकहितका लागि सक्रियता बढाउने हो । २. बदलिँदो परिवेशमा पत्रकार महिलाहरुलाई क्षमता विकासका कार्यक्रम र प्रविधिवारे जानकारी बनाउने । ३. मिडियालाई लैंगिकमैत्री बनाउनका लागि सन्चार संस्थालाई लैंगिक निर्देशिका जारी गर्नका लागि संचार संस्थालाई खबरदारी गर्ने छ । ४. कार्यस्थलमा हुने यौनजन्य हिंसा तथा दुव्र्यवहारविरुद्धका सचेतनामूलक कार्यक्रमहरुलाई विभिन्न निकायसँग समन्वय र सहकार्य गरेर सन्चालन गर्ने । ५. मिडिया हाउसहरुमा पत्रकार महिलाहरुको नेतृत्व वढाउनका लागि पहल गर्ने । ६. देशमा व्याप्त भ्रष्टचारको अन्त्य, सुशाशन कायम होस् भनि जेन्जी आन्दोलनमा उठाइएका सकरात्मक मागप्रति पत्रकारिता क्षेत्रबाट निरन्तर पैरवी गर्ने । ७. पत्रकारिताप्रतिको विश्वसनियता र जवाफदेहितालाई आत्मसाथ गर्दै खोजमूलक, फेलोसिप सहितको तालिम सन्चालन गर्दै पत्रकार महिलालाई लेखनवृतिको अवसर प्रदान गर्नेछ । ८. बाँकेमा कार्यरत पत्रकार महिलाहरुको अवस्था, चुनौती र अवसरका विषयमा अध्ययन तथा अनुसन्धान गर्नेछ । ९.डिजिटल सुरक्षा, तथ्य जाँच, र भ्रामक सूचनाविरुद्ध अभियान (सामाजिक सन्जालमा फैलने भ्रामक सूचना, टिप्पणी, डिजीटल हिंसा बिरुद्ध संगठित रूपमा अभियान चलाउने) महिला पत्रकारका लागि डिजिटल सुरक्षा तालिम, अनलाइन दुव्र्यवहार प्रणालीमा र तत्थ जाँचमा जोड दिन माग गर्दछ । १०. लुम्बिनी प्रदेश सरकारले दिने पुरस्कार, सम्मान, विभिन्न नियुक्ति, अध्ययन तथा वैदेशिक भ्रमणका अवसरमा पत्रकार महिलालाई प्राथमिकता दिन जोडदार माग गर्दछ ।
Prawash Kumar Shakya । ३० कार्तिक २०८२, आईतवार १७:२१ बजे