१३ पुस, काठमाडौं । दुई देशबीच असीमित उडान गर्ने गरी भारतले अघि सारेको खुला आकास सम्झौताको प्रस्तावलाई नेपालले अस्वीकार गरेको छ ।
नेपाल र भारतका अधिकारीहरुबीच अघिल्लो साता भएको वार्तामा भारतले खुला आकास सम्झौताको प्रस्ताव गरेको थियो ।
नेपाली पक्षले भने यसका लागि नेपाल अहिले तयार भइ नसकेको बताएको छ । ‘भारतले खुला अकास नीति लिएको छ । तर, नेपालले भने छैन,’ पर्यटन मन्त्रालयका सहसचिव सुरेश आचार्यले अनलाइनखबरसँग भने, ‘हाम्रो एउटा मात्रै अन्तर्राष्ट्रिय विमानस्थल छ, अरु बनिसकेका छैनन् । पूर्वाधार नै बनिनसकेकाले अहिले खुला आकास सम्झौता गर्न सक्दैनौं भनेका छौं ।’
आचार्यका अनुसार अबको दुई वर्षपछि पूर्वाधार बनिसक्ने र त्यसपछि छलफल गर्न सकिने नेपालले भारतलाई बताएको छ । भैरहवास्थित गौतम बुद्ध अन्तराष्ट्रिय विमानस्थलको विस्तारको काम चलिरहेको छ भने पोखरामा पनि विमानस्थल बन्दैछ ।
नेपाल र भारतबीच अहिले दुबै पक्षबीच ३० हजार सिटको सम्झौता छ ।
यो बैठकमा नेपालले माग गर्दै आएको तीन हवाई रुट खुला गर्नेबारे अध्ययन गर्न संयुक्त प्राविधिक समिति बनाउने सहमति भएको छ ।
नेपालले जनकपुर, भैरहवा र नेपालगञ्जबाट नयाँ एयर रुट माग गरेको छ ।
साभारः अनलाइनखबर
Prawash Kumar Shakya । १३ पुष २०७३, बुधबार १०:१४ बजे