कर्णाली प्रदेशका मुख्यमन्त्री यामलाल कँडेलले फागुन २१ गते तोकिएको मितिमा निर्वाचन गराउने हो भने प्रमुख राजनितिक दललाई पाखा राख्ने सोच त्याग्न सुझाव दिनुभएको छ । उहाँले निर्वाचनको विषयमा अझै संशयमा भन्दै दलहरूबीचको सहमतिले मात्र निर्वाचनको वातावरण बन्ने धारणा राख्नुभएको छ ।
आजदेखी वीरेन्द्रनगरमा शुरु भएको प्रदेश सुरक्षा गोष्ठीमा मुख्यमन्त्री कँडेलले सरकारका कतिपय गतिविधिकै कारण निर्वाचनको वातावरण अझै तयार नभएको समेत दावी गर्नुभयो ।
मुख्यमन्त्री कँडेलले निर्वाचनका सन्दर्भमा भयरहित वातावरण र सुरक्षा प्रमुख विषय रहेको भन्दै भदौ २३ र २४ गतेपछि सुरक्षा अवस्थाले भयरहित वातावरण वन्न नसकेकोमा जोड दिनुभयो । उहाँले सुरक्षा अवस्था पहिलेको जस्तो नरहेको र सुरक्षाकर्मीमा समेत मनोबैज्ञानिक त्रास रहेको भन्दै निर्वाचनको वातावरण बनाउन सुरक्षाकर्मी त्रसित मनोविज्ञानवाट मुक्त हुनुपर्ने धारणा राख्नुभयो ।
मुख्यमन्त्री कँडेलले भन्नुभयो, ‘यहाँ व्यक्त नभएपनि सुरक्षाकर्मी साथीहरु एकप्रकारले मनोबैज्ञानिक रुपमा त्रसित हुनुहुन्छ, उहाँलाई दिइएको हतियार परिआएमा प्रयोग गर्ने वा नगर्ने द्विविधा हुनुहुन्छ यस्तो अन्यौल अवस्थामा निर्वाचनको वातावरण कसरी बन्न सकला ? उहाँले निर्वाचनका सन्दर्भमा दलहरुबीचनै सहमति नभएकोले अन्यौल रहेकोले सरकारले दलिय सहमतिलाई प्राथमिकता दिनुपर्ने बताउनुभयो । निर्वाचनको बुथमा रहने ४ जना प्रहरीको भरमा मतदान केन्द्रको सुरक्षा कसरी हुन्छ भन्दै सबै दलले भागलिने परिस्थिति बन्न सके मात्र निर्वाचन सम्भव हुने उहाँले बताउनुभयो ।
मुख्यमन्त्री कँडेलले प्रमुख दलका शिर्ष नेतालाई स्थानहद तोकेर निर्वाचनको वातावरण बन्न नसक्ने बताउदै यस सम्बन्धमा सरकारले तत्काल निर्णय गर्नुपर्ने धारणा राख्नुभयो । उहाँले भने, दलीय व्यवस्थामा दललाई पाखा राखेर निर्वाचनको वातावरण सम्भव छैन, निर्वाचन गराउने हो भने, दलहरुसंग सघन छलफल गर्नुहोस । मुख्यमन्त्री कँडेलले प्रधानमन्त्री सुशिला कार्कीले प्रमुख दलका शिर्ष नेताहरुसंग गरेको सम्वादलाई सकारात्मक रुपमा लिनुपर्ने र यस्तो संवाद र छलफलले मात्र मुलुकलाई निर्वाचनमा लैजान सकिने बताउनुभयो ।
जेन्जीका नाममा समाजमा कतिपय आतंक सृजना गरिएको बताउर्दै मुख्यमन्त्री कँडेलले कानून उल्लघंन गर्ने जोकोहीलाई पनि दण्डित गर्ने अवस्था नरहे शान्ति सुरक्षा बनावटी मात्र हुने धारणा राख्नुभयो । उहाँले भने, ‘भदौ २३ गते युवाहरुले उठाएको भ्रष्टाचार नियन्त्रण र सुशासनको मागप्रति कसैको विमति छैन तर २४ गते भएको विध्वश र आगजनी गर्ने माथि कारवाही नभएसम्म शान्ति सुरक्षाप्रति विश्वस्त हुने अवस्था छैन ।’ मुख्यमन्त्री कँडेलले आगजनी र लुटपाटमा संलग्नमाथी सरकारले नै कारवाही नगर्न सुरक्षा निकायमाथी गरेको दवावप्रति असन्तुष्टी जनाउनुभयो ।
मुख्मन्त्री कँडेलले कर्णाली राजमार्गमा बढदो सवारी दुर्घटना, लागु पदार्थको दुर्व्यवसन जस्ता विषयमा यहाँका सुरक्षा निकायले कडाईका साथ नियनत्रण गर्नु पर्ने धारणाा राख्नुभयो । उहाँले कर्णालीमा सुरक्षाकर्मीहरूको पूर्वाधार र साधन श्रोतको अवस्था दयनिय रहेकोले पनि शान्ति सुरक्षा कायम गर्न प्रहरी प्रशासनलाई परेको अप्ठयारो प्रति गृहमन्त्रीको ध्यानाकर्षण गराउनुभयो ।
Prawash Kumar Shakya । ९ पुष २०८२, बुधबार १४:४३ बजे